Actualidade

A Rede Iberoamericana para o Aseguramento da Calidade na Educación Superior (RIACES) reúne ao redor de 50 membros entre axencias e organismos oficiais que representan a 18 países de América e España.

ACSUG, que desde 2012 vén acreditando con criterios europeos universidades de Perú, México e República Dominicana, foi integrada como membro da devandita rede iberoamericana na XXII Asemblea Xeral celebrada recentemente en Río de Xaneiro.

Desde hai anos, ACSUG vén expandindo a América Latina o sistema europeo de educación superior, o que mereceu unha referencia de excelencia por parte de ENQA. Con este obxectivo de internacionalización da educación universitaria, coordinou un encontro en Buenos Aires dos reitores das tres universidades públicas galegas e a Consellería de Educación, Universidades e Formación Profesional, e traballa actualmente no establecemento de dobres titulacións de doutoramento para comezar no presente curso e de grao para o próximo.

ACSUG sente moi honrada pola consideración tan especial que tivo RIACES ao admitila a formar parte entre os membros dos 18 países que a constitúen. Isto permitiranos ser aínda máis activos nas nosas actividades en Iberoamérica.

O ano 2025 marca unha nova etapa de traballo e de proxección da ACSUG cara o futuro, trala certificación de EQAR e de ENQA de acreditación para os próximos catro anos e a aprobación dun novo Plan Estratéxico 2025-2030, é dicir, para os próximos 5 anos.

A visita e avaliación de ENQA en 2024 foi moi esixente, pero foi tamén un revulsivo e creou unha conciencia de compromiso da ACSUG por mellorar ela mesma internamente e contribuír á mellora da calidade das nosas universidades galegas.

Nada máis rematar a visita de ENQA, a Axencia puxo mans a obra para conformar un Plan Estratéxico no que estivo profundamente implicado o persoal da ACSUG, que elaborou un primeiro borrador, sometido logo a consulta do Consello Asesor e do Consello Reitor, que fixeron observacións moi importantes, do que se beneficiou moi oportuna e convenientemente a redacción última, que foi finalmente aprobada polo Consello Reitor na súa sesión de 15 de xullo do presente ano 2025.

Iniciamos así un novo ciclo, tralo o recoñecemento e acreditación de EQAR e ENQA, en excelentes condicións para mellorar o funcionamento interno e externo da Axencia, coa satisfacción do traballo ben feito, co recoñecemento europeo e coa disposición a traballar no ámbito da calidade universitaria, non só en Europa, senón tamén en América Latina, labor amplamente recoñecido por ENQA pola importancia de expandir a esa parte do mundo os criterios europeos de educación superior e de contribuír á mellora do sistema latinoamericano de educación superior. Neste sentido, compre engadir que, ademais da pertenza da ACSUG á rede INQAAHE, xa está solicitada a pertenza a RIACES (Red Iberoamericana de Agencias de Calidad de Educación Superior) trala solicitude da Secretaria da devandita rede na que manifesta o seu desexo e satisfacción de que ACSUG poida formar parte da devandita rede porque “su compromiso con la calidad educativa es ampliamente reconocido”.

A ACSUG asistiu ao curso de verán “Unha IA falando con outra IA. Xestión da Calidade Universitaria” organizado pola Universidad Complutense de Madrid (UCM), en colaboración coa Fundación para el Conocimiento Madri+d e a a Universidad Internacional de la Rioja (UNIR).

A Intelixencia Artificial (IA) está transformando todos os sectores, e a educación superior non é unha excepción. Pode a IA ser unha aliada na avaliación da calidade universitaria? Como poden as universidades e as axencias de avaliación aproveitar o seu potencial sen perder o xuízo humano? Estas e outras cuestións relacionadas coa IA xerativa foron o foco do debate entre universidades e axencias de calidade nun ciclo de conferencias celebradas entre o 2 e o 4 de xullo en San Lorenzo de El Escorial, Madrid.

As axencias participantes no programa DOCENTIA desenvolveron a seguinte documentación e ferramentas a partir da integración e actualización da documentación previa do programa. Esta nova versión da guía do programa DOCENTIA mantén os fundamentos e aspectos operativos das diferentes versións elaboradas desde 2007, ao tempo que recolle os avances derivados dos resultados e as recomendacións aportadas polos diferentes grupos de interese no programa.

Guía de acompañamento do Programa DOCENTIA 2025

Anexos da Guía de acompañamento do Programa DOCENTIA 2025

Dentro do marco da convocatoria ordinaria para solicitar a avaliación previa a asignación das retribucións adicionais relativas ao complemento de recoñecemento á excelencia curricular e se abre o prazo de presentación de solicitudes correspondentes á convocatoria do 2024 (publicada pola RESOLUCIÓN do 5 de decembro de 2024), ACSUG celebrou o pasado 22 de abril, unha xornada de traballo con vinte expertas e expertos, participantes nese proceso de avaliación, representativos de todos os ámbitos do coñecemento. 

Nesta xornada traballouse para poñer en común os criterios de interpretación do baremo aplicados por cada comisión para, por un lado, evitar discrepancias na interpretación do baremo entre as comisións, e por outro, respectar as particularidades propias das distintas ramas do coñecemento na aplicación do mesmo. 

Este traballo tamén serviu para recoller propostas de mellora a aplicar nunha eventual revisión dos criterios de avaliación dos complementos retributivos, así como na metodoloxía do proceso de avaliación en xeral.

No marco do convenio de colaboración entre a Axencia para a Calidade do Sistema Universitario de Galicia (ACSUG) e o Instituto Tecnológico de Santo Domingo (INTEC), celebrouse un seminario de formación sobre a importancia dos Sistemas de Garantía de Calidade en Institucións de Educación Superior. 

O programa formativo de este seminario, celebrado na sede de INTEC en República Dominicana entre o 28 e o 30 de abril de 2025 deseñouse cos seguintes obxectivos 

• Sensibilizar sobre a importancia de contar cun Sistema de Garantía de Calidade. 
• Proporcionar aos asistentes os conceptos básicos sobre os modelos de xestión de calidade, a xestión por procesos, a mellora continua dos mesmos, así como sobre o ciclo PDCA de mellora continua.
• Presentar o Modelo de Avaliación de SGC Fides-Audit de ACSUG.

Luis Velón, técnico en xestión de calidade de ACSUG, participou como observador no comité externo da Asociación Europea de Establecementos de Formación Veterinaria (EAEVE) que levou a cabo a avaliación do Grao en Veterinaria no Campus de Lugo da Universidade de Santiago de Compostela (USC).

O proceso de avaliación incluíu unha visita presencial á universidade, realizada entre o 24 e 28 de marzo de 2025.

ACSUG, como Axencia par a Calidade do Sistema Universitario Galego, ven colaborando intensamente co Goberno de Galicia e coas universidades galegas na avaliación do I+D+i, tanto no que se xestiona a través da Secretaría Xeral de Universidades como a través de GAIN, pertencentes ambas seccións á Consellería de Educación, Ciencia, Universidade e Formación Profesional.

Por esta razón, a Axencia síntese moi leda co novo programa presentado polo Presidente da Xunta de Galicia, no que anunciou en presencia de máis de un millar de persoas do ámbito da universidade, da empresa e de diferentes referentes da investigación en Galicia, unha folla de ruta con unha inversión de 1.310 millóns de euros, na busca de transformar o modelo produtivo galego e converter Galicia nun referente, tanto nacional como internacional. 

Un aliciente máis para o traballo da ACSUG, empeñada en mellorar a calidade das universidades galegas e dos centros de investigación de Galicia.

O Director de ACSUG e o seu presidente asistiron á presentación do libro sobre “A investigación educativa en Galicia 2015-2024”, un acto que estivo presidido polo Conselleiro de Educación, Ciencia, Universidades e Formación Profesional, a quen acompañou na mesa o reitor da Universidade de Santiago, o coordinador do estudo, Miguel Ángel Santos Rego, que á súa vez é o presidente da CGIACA, e o director da editorial Galaxia, responsable da edición. 

Trátase do terceiro dos estudos, elaborados por períodos de dez anos, para poñer en valor o desenvolvemento da investigación en Galicia na última década 2015-2024, tal como vén sendo habitual neste tipo de traballos. 

Recollendo unha frase do propio estudo: “sen avaliación non hai progreso no espazo público”, temos que dicir que AGSUG non podía deixar de asistir a un acto de presentación como este, dado que o fin primordial da Axencia é a avaliación: avaliación de todos os títulos de grao, máster, doutoramento e sistema de garantía de calidade do SUG; avaliación institucional; avaliación do profesorado, avaliación de todo o concernente ao I+D+i de nosa Comunicade etc. 

Desde ACSUG manifestamos o noso recoñecemento ao esforzo de todos os que traballan pola excelencia en educación e ao coordinador deste traballo, terceiro dunha serie que vén repetindo cada dez anos.

A Axencia para a Calidade do Sistema Universitario de Galicia presentou o seu décimo cuarto estudo sobre a inserción laboral dos graduados e graduadas nas tres universidades públicas de Galicia. 

Iniciados xa no ano 2005 estes estudos de análises de datos recolleitos a través de chamada telefónica persoal a cada un dos graduados universitarios aos catro anos de finalizar a súa carreira universitaria, nesta ocasión ofrécense os resultados dos que finalizaron en 2018, co fin de recoller as opinións dos enquisados tras seis anos de finalizar, para deixar tempo a que unha gran maioría –ata un 55% dos que fixeron un grao- puidesen realizar unha segunda titulación de #máster, doutoramento ou, mesmo, un segundo grao. 

Mediante enquisa telefónica, na que o egresado había de responder a 74 cuestións, entrevistouse a 7.643 graduados e graduadas, obtendo resposta de 3.356, o que lle outorga ao estudo a fiabilidade dun 95%. 

Enmárcase este traballo que ACSUG vén realizando anualmente no afán de cumprir co seu obxectivo de recoller, canalizar e fornecer á Consellería de Educación, ás universidades, aos empregadores e aos futuros estudantes universitarios e as súas familias toda a información necesaria para que coñecéndoa tomen as decisións necesarias e mellores cada un segundo o que lle corresponde. 

Cunha empregabilidade que supera o 90%, na que se observa que máis dun 75% fano en Galicia, está claro que o que se gasta en educación non é un gasto, senón un investimento. 

Todos os datos que na presentación ofrecéronse agrupados, pronto se verán desagregados por universidade, campus e titulación na web de ACSUG.

ACSUG levou a cabo en febreiro de 2025, tanto unha auditoría interna, como a primeira auditoría de seguemento (xestionada pola Asociación Española de Normalización e Certificación (AENOR), correspondente ao ciclo actual de certificación (2024-2027) do Sistema de Xestión de Calidade da axencia.

Segundo se indicou nos informes finais das auditorías, o sistema de xestión mantense actualizado e implántanse as medidas necesarias para incidir na mellora das actividades. Por quinto ano consecutivo non se detectaron Non Conformidades nas auditorías.

Hai que recordar que o Sistema de Xestión de ACSUG está certificado segundo a norma ISO 9001, e que, ao ser AENOR membro de IQNet, as certificacións obtidas por ACSUG son recoñecidas internacionalmente.